Umugore w’umunyapolitiki utavuga rumwe n’ubutegetse bwa Uganda, Dr Kiiza Besigye ejo kuwa 14/8/2019 yamaze gusezera ku kuba umuyobozi Nshingwabikorwa w’umuryango mpuzamahanga wa OXFAM.
Madamu Winnie Byanyima aritegura gufata umwanya mushya yahawe mu muryango w’abibumbye, aho agiye kuba umuyobozi Nshingwabikorwa w’Ishami ry’umuryango w’abibumbye rishinzwe kurwanya Sida (UNAIDS).
Uyu mwanya agiye kujyaho, mu myaka 25 ishize nta mugore wari wawuyobora. Uyu mugore ahuriye n’umugabo we mu ishyaka ritavuga rumwe n’ubutegetsi bwa Yoweri Kaguta Museveni, FDC; yabaye umudepite muri Uganda aho yari ahagarariye intara ya Mbarara mbere y’uko ajya gukora muri OXFAM.
Ni umwe kandi mu bashinze ishyaka FDC mu mwaka w’2000. Mu butumwa bw’umunyamabanga mukuru w’iri shyaka yishimira iyi ntera; Nathan Nandala Mafabi yavuze ko Byanyima yari akwiye umwanya ukomeye nk’umugore w’impirimbanyi.
