Komisiyo y’igihugu y’amatora muri Zimbabwe yashyize hanze urutonde rw’abakandida 11 bazahatanira umwanya w’umukuru w’igihugu mu bakandinda 22 bari bifuje guhatanira uyu mwanya.
Nk’uko bitangazwa na Komisiyo y’amatora ngo umukandida wese yagombaga kubanza kwishyura amadorari 20 000 kugira ngo yemererwe gushyirwa k’urutonde rwanyuma ariko ababashije kubigeraho ni 11 naho abandi 11 barasigara.
Ayo matora yitezwemo guhatana gukomeye hagati ya Emmerson Mnangagwa usanzwe ari ku butegetsi, uri mu ishyaka rya Zanu-PF na Pasiteri akaba n’umunyamategeko Nelson Chamisa wo mu ishyaka rya Citizens Coalition for Change, CCC, bombi bahabwa amahirwe kurusha abandi.
Komisiyo y’Amatora yatangaje ko abakandida 11 bavanwe mu matora yo ku ya 23 Kanama, kuko abenshi muri bo barimo Linda Masarira, bananiwe kwishyura amadolari 20.000 bitarenze ku wa Gatatu kugira ngo bemererwe kwiyamamaza.
Masarira nyuma yo gukurwa mu bazitabira amatora yavuze ko yabonye ko amadolari 20.000 ari menshi kandi ko gucibwa ayo mafaranga yose ari ivangura ritemewe imbere y’amategeko nk’uko Reuters yabitangaje.
Amatora ya Perezida n’ay’Inteko Ishinga Amategeko muri Zimbabwe ateganijwe ku munsi umwe.
Mu gihe Mnangagwa na Chamisa bakomeje guhabwa amahirwe yo kuyobora Zimbabwe kurusha abandi bakandida, hashize iminsi hari umukandida wigenga wemeje ko azitabira amatora.
Saviour Kasukuwere wahoze mu buhungiro, yahoze ari minisitiri muri guverinoma ya Robert Mugabe, aziyamamaza nk’umukandida wigenga. Abasesengura ibya politiki bavuga ko ari umukandida utazorohera ishyaka rya ZANU-PF.
Kasukuwere wahunze igihugu mu gihe ubutegetsi bwa Mugabe bwahirikwaga, yari afite intekerezo zo kuziyamamariza umwanya wa Perezida na mbere.
Mnangagwa ufite imyaka 80 arashaka indi manda mu gihe ubukungu bw’igihugu bwifashe nabi aho amadolari ya Zimbabwe yataye agaciro hejuru ya 50% muri uku kwezi ugereranyije n’idolari rya Amerika.
Mnangagwa yashimye inzira ya demokarasi nyuma yo kumva ko kandidatire ye yemejwe mu Rukiko Rukuru.Chamisa watsinzwe amatora aheruka muri 2018, yavuze ko ishyaka rye ryiteguye gufata ubutegetsi kuri iyi nshuro
Gusa n’ubwo bimeze gutya ubukungu bw’iki gihugu bwifashe nabi kuburyo abaturage baba basaba Leta kugira icyo yakora n’ubwo benshi bemeza ko bigoye.
