Ku munsi wo kuwa Mbere tariki ya 23 Ugushyingo 2020 nibwo mu bitangazamakuru byo mu Rwanda hacicikanye inkuru ivuga ko Sgt Maj. Robert Kabera uzwi nka Sgt Robert yatorotse igisirikare agahungiira mu gihugu cya Uganda aho bikekwako yasambanyije umwana we yibyariye.
Nyuma nibwo amakuru yamenyekanye ko Sgt Maj.Robert yahungiye mu gihugu cya Uganda, aho yasobanuye ko yahunze ubutegetsi bw’u Rwanda ashinja gushaka kumwivugana bumuziza kuba avugana nabo mu muryango w’Intwari y’u Rwanda Maj. Gen.Fred Gisa Rwigema.
Aganira na Daily Monitor dukesha iyi nkuru Sgt Maj Robert Kabera yavuze ko impamvu yatumye ahungira muri Uganda ari uko ahigwa bukware na Guverinoma y’u Rwanda. Yagize ati” Guverinoma y’u Rwanda ntiyifuza umuntu wese uvugana n’umuryango wa Rwigema kandi njye dufitanye isano”
Sgt Maj Kabera yabwiye itangazamakuru rya Uganda ko yambutse umupaka wa Uganda kuwa 19 Ugushyingo 2020.Abajijwe ku birego aregwa, Sgt Maj Kabera yahakanye yivuye inyuma ibyaha ubushinjacyaha bw’u Rwanda bumushinja , ahubwo yemeza ko itariki ya 21 Ugushyingo bavuga ko yabikoreyeho yari yaramaze kugera muri Uganda cyane ko ngo yambutse ku mupaka wa Kagitumba kuwa 19 Ugushyingo 2020.
Sgt Major Kabera Robert yamenyakanye cyane mu tsinda rya Gisirikare rikora umuziki, rizwi nka Army Jazz Band.Aho yanagiye akora indirimbo ze bwite zakunzwe na benshi mu bakurikira umuziki nyarwanda.
.Kuwa 23 Ugushyingo nibwo ubushinjacyaha bwa Gisirikare bwatangaje ko bwatangije iperereza ku byaha aregwa bivuga ko bifitanye isano no gusambanya umwana w’imyaka 15 y’amavuko.
Ildephonse Dusabe
