Beni: Umusirikare mukuru n’umupolisikazi bishwe n’abaturage bashinjwa gufasha ADF

Kuva kuwa gatandatu, tariki ya 16 Mutarama 2021 kugera ku Cyumweru tariki ya 17 Mutarama 2021, umusirikare mukuru wa Kongo n’ umupolisi bamaze kwicwa n’urubyiruko rwakoze ibisa n’imyigaragambyo mu gace ka  Lume gaherereye ku birometero 45 uvuye mu mujyi wa Beni rwagati.

Ikinyamakuru Actualitecd cyanditseko Col. Vita Kitambala n’uyu mupolisikazi bishwe n’uru rubyiruko, nyuma yo kubakekaho gushyigikira no gukingira ikibaba umutwe wa ADF ukomeje kubahungabanyiriza umutekano umunsi ku munsi.

FARDC yemeje amakuru avuga ku iyicwa rya Col.Kitambala wari usanzwe ashinze ibikorwa byo gukangurira abarwanyi b’imitwe yitwaje intwaro kumanika amaboko .

Umuvugizi wa Polisi mu mujyi wa Beni Nasson Murara yemeje ko hari n’umupolisi wapfuye gusa ngo amazina ye bitemewe kuyatangariza itangazamakuru mu gihe hagishakishwa uru rubyiruko rwagize uruhare mu rupfu rwe.

Ildephonse Dusabe