Umutwe wa RNC ufatwa na Leta y’u Rwanda nk’umutwe w’iterabwoba ukomeje ku bangamirwa no kutishimira icyemezo cya Leta ya Mozambique cyo kwitabaza ingabo z’u Rwanda ziheruka kujya muri Mozambike mu rwego rwo guhashya umutwe ugendera ku mahame ya k’Isiramu umaze igihe uteza umutekano muke mu Ntara ya Cabo Delgado ndetse kugeza ubu ukaba umaze guhitana abantu basaga 3000.
Mu Itangazo ryashizwe ahagaragara na Etienne Mutabazi Umuvugizi wa RNC ya Kayumba Nyamwasa kuwa 11 Nyakanga 2021, rivuga ko RNC itewe impungenge n’ingabo z’uRwanda (RDF) hamwe n’abapolisi bose bagera ku 1000 boherejwe mu Ntara ya Cabo Delgado kuwa 9 Nyakanga 2021 k’ubusabe bwa Leta ya Mozambike.
Iri tangazo rikomeza rivuga ko ikifuzo cya RNC ari uko ingabo z’ibihugu bigize umuryango wa SADC zonyine zagakwiye kohereza ingabo muri Mozambique ndetse banasaba ubutegetsi bwa Perezida Fillip Nyusi guhagarika amasezerano yagiranye na Leta y’u Rwanda.
Ni iki RNC ikomeje kwikanga muri Mozambique?
Kuva RNC yashingwa mu 2010 ,yahinduye ibihugu byo mu Majyepfo y’Afurika birimo n’igihugu cya Mozambique nk’indiri yayo akaba ari no muri ibi bihugu by’umwihariko igihugu cya Afurika y’Epfo aho Umutwe wa RNC ufite ikicaro ndetse utegurira ibikorwa by’iterabwoba ku Rwanda .
Mozambike kandi ni kimwe mu bihugu Umutwe wa RNC wakunze gukoreramo cyane , doreko wahashinze n’ishami ndetse ukaba unahafite abayoboke bahuje ingengabitekerezo yo guhungabaya u Rwanda.
Aba bayoboke ba RNC baba muri Mozambike bakaba barakunze kwibasira abandi banyarwanda bahakorera ubucuruzi babaziza ko banze kwiyunga nabo muri gahunda zabo zo guhungabanya umutekano w’ u Rwanda.
Urugero ni umunyarwanda witwa Baziga Louis wari uhagarariye abanyarwanda baba muri Mozambike wishwe n’abambari ba RNC kuwa 26 Kanama 2019 i Maputo muri Mozambike ndetse uwitwa Kazigaba Andre wahoze muri RNC nyuma bakaza gushwana akajya muri RRM yashinzwe na Sankara, yaje ku byigambya avuga ko Baziga Louis yabonye igihembo cyo gukorera Leta y’u Rwanda.
Si Baziga Louis gusa wakorewe urugomo n’agatsiko ka RNC kaba muri Mozambike kuko n’undi munyarwanda ukorera muri Mozambike witwa Hitimana vital yarusimbutse nyuma yo kuraswa urufaya rw’amasasu.
Usibye ibikorwa by’urugomo bikorwa na RNC muri Mozambike , benshi mu bayobozi ba RNC barangajwe imbere na Kayumba Nyamwasa bahafite ibikorwa by’ubucuruzi aho Kayumba mu misanzu yibye abayoboke ba RNC yaguze ikamyo za Rukururana maze azohereza muri Mozambike ku mucuruzi witwa Alex mu rwego rwo kuzimuragiza maze arangije ashora indi mari m’ubucuruzi bw’ibiribwa nabyo abishinga Etienne Mutabazi bakunze kwita Kanyarengwe ,ariko nyuma aza kubishira mu maboko ya Ntamuhanga Cassien wari usigaye akorera RNC muri Mozambike akaba aheruka gutabwa muri yombi n’inzego zishinzwe umutekano za Mozambike.
Abakurikiranira hafi ibibera muri RNC ,bavuga ko kuba RNC yari yaragize Mozambike imwe mu ndiri yayo, umubano mwiza ukomeje gufata intera hagati ya Leta y’uRwanda na Mozambike watumye abayobozi ba RNC barangajwe imbere na Kayumba Nyamwasa bakomeza kwikanga no kugira impungenge kuko bakeka ko ibikorwa bari basanzwe bahakorera byaba ibya Politiki n’Ubucuruzi bishobora guhagarara bikabateza igihombo.
Hategekimana Claude
