Amakuru aturuka mu Ntara ya Cabo Delgado, mu gace ka Palma avuga ko kuri uyu wa 2 Kanama2021 ingabo z’u Rwanda zomngeye kwivugana abarwanyi babarirwa muri 70 b’umutwe w’inyeshyamba ugendera ku mahame akomeye ya Kislam.
Igitangazamakuru Upstream gifite umwihariko wo gutangaza amakuru ajyanye n’ubucukuzi bw’ibikomoka kuri peteroli na gazi kuri uyu wa 2 Kanama 2021 cyavuze ko ingabo z’u Rwanda ziciye aba barwanyi mu mirwano yabereye mu gace ka Palma.
Palma ni agace Leta ya Mozambiquegakungahaye cyane kuri gazi nyinshi, kakaba kamaze igihe kari mu maboko y’uyu mutwe w’iterabwoba ukunze kwiyita Al Shabaab.
Iki gitangazamakuru cyatangaje ko kandi ingabo z’u Rwanda ziri gutegura urugamba rugamije gukura abarwanyi b’uyu mutwe no mu gace ka Macimboa da Praia bigaruriye.
Ingabo z’u Rwanda zatangiye imirwano n’abarwanyi b’uyu mutwe guhera tariki ya 20 Nyakanga 2021 mu gace ka Afungi. Icyo gihe zari ku burinzi, zihura n’aba barwanyi zibarasaho, zica abarenga 30, abandi bahungira ku mupaka uhuza Mozambique na Tanzania.
Umuvugizi wazo, Col. Ronald Rwivanga aherutse gutangaza ko kuva tariki ya 24 kugeza ku ya 28 Nyakanga 2021, zivuganye abarenga 10, zigarurira bimwe mu bice bari barafashe, zifata n’ibikoresho bari bafite birimo intwaro.
Col. Rwivanga yavuze ko nta musirikare w’u Rwanda wigeze agwa muri iyi mirwano, ko umwe ni we wakomerekeyemo.
