Ejo ku munsi wa Gatanu Igisirikare cy’Uburusiya cyatangaje ko kigiye gushira imbaraga zacyo nyinshi mu gace k’uburasirazuba bwa Ukraine .
Ibi byatangajwe n’Umugaba w’Ingabo wungirije aho yavuze ko ikigamijwe ari ukubohora intara yose ya Donmbas no kuyirinda ibitero by’ingabo za Ukraine.
Yanongeyeho ko mu kwezi kumwe gushize Uburusiya butangije ibikorwa bidasanzwe bya gisirire muri Ukraine ,intego yambera bifuzaga babashije kuyigeraho ariyo gusenya ibikorwa remezo by’ingenzi by’igisirikare cya Ukraine no kugica intege.
Uburusiya kandi buvuga ko ubu igice cya kabiri cy’urugamba kigiye gutangira bashira imbaraga nyinshi mu majyepfo n’uburasirazuba bwa Ukraine mu gace gaherere hafi y’inyanja ya Azov mu rwego rwo kurinda uduce bumaze kwigarurira no kurinda abaturage bavuga ururimi rw’Ikirusiya bushinja Ukraine kubakorera Jenoside.
Mu gihe Uburusiya bwabasha gushimangira imbaraga zabwo muri aka gace bivuze ko bwaba aribwo bugenzura inyanja ya AZOV ifite icyo ivuze kinini ku bucuruzi bwa Ukraine n’ahantu hingenzi ku barusiya .
Abasesenguzi mu bya politiki bavuga ko mugihe Uburusiya bwabasha kubigeraho yaba ari insinzi ikomeye kuri Moscow kuko bwabasha kugenzura ijana ku ijna inzira zose zo kubutaka n’inyanja muri ako gace.
Ubusanzwe ingabo z’Uburusiya zari zimaze ukwezi zirwanira mu duce twinshi dutandukanye guhera mu Majyaruguru zerekeza mu murwa mukuru Kiev, Amajyepfo, n’Uburasirazuba.
Mu Majyepfo n’iburasirazuba ingabo z’Uburusiya zagabye ibitero ku duce duhuza inyaja ya AZOV n’inyanja y’umukara ubasha gufata umujyi munini wa Kherzon, ubu imirwano ikomeye ikaba iri kubera mu mujyi wa Mariupol.
Aka gace gasanzwe ari agace kanini cyane kuva mu ntara ya Donbass igenzurwa n’Ingabo zishigikiwe n’Uburusiya kuva 2014 kugeza mu marembo ya Mykolaiv ugakomeza i Melitopol,Berdiansk kugera mu ntara ya Crimee yigaruriwe n’Abarusiya mu 2014. Aha akaba ariho ingabo z’Uburusiya zishaka gushira imbaraga zabwo zose mu rwego rwo kugenzura intara yose ya Donbass nk’uko bitangazwa n’ubuyobozi bukuru bw’Ingabo z’uburusiya
Hategekimana Claude
