FDLR na M23 baritana ba mwana ku rupfu rwa Maj Quebec wari warajujubije FDLR na M23 imvo n’imvano y’urupfu rwe yabaye amayobera.
Imirwano imaze iminsi ibiri ihanganishije ingabo za Repubulika Iharanira Demokarasi ya Congo FARDC n’inyeshyamba za M23,aya makuru akaba yaremejwe na Lt Col Ndjike Kaiko Umuvugizi wa FARDC muri Operasiyo Sokola II mu kiganiro aherutse kugirana n’Umunyamakuru wa Rwandatribune ukorera iGoma.
Lt.Col Ndjike Kaiko avuga ko ingabo za Leta zisubije umusozi wa Tshanzu akaba ari ibyishimo ku baturage bose. Ibi Col Kaiko yabitangaje mu kiganiro yagiranye n’itangazamakuru ejo kuwa gatandatu taliki 21 Gicurasi 2022 mu masaha ya mu gitondo.
Isoko y’amakuru ya Rwandatribune iri i Tshanzu ivuga ko FARDC yakoze iyo bwabaga muri iyi minsi itatu ishize kugirango igenzure uduce twa Runyoni na Tshanzu ariko mu masaha y’umugoroba yo kuwa 21 Gicurasi ntibyabahiriye kuko M23 yabamanukanye yariye karungu ikabasubiza mu bisiza.
Muri iyi mirwano abarwanyi ba Mai Mai CMC ku ruhande rwa Gen.Dominique n’abarwanyi b’umutwe wa FDLR/CRAP bayobowe na Lt Habiyakare barwanye ku ruhande rwa Leta ya Kinshasa.
Mu kiganiro Rwandatribune yagiranye n’umwe mu bayobozi ba Sosiyete sivili wo muri Gurupoma ya Jomba ,Teritwari ya Rutschuru utashatse ko amazina ye atangazwa ,yemeje ko ubwo imirwano yatangiraga kuwa 3 Maj Quebec wari indwanyi ikomeye muri FARDC yahise yicirwa muri iyi mirwano. Uyu muyobozi kandi avuga ko harikwitana ba mwana kuwaba yamwishe cyane ko uyu mugabo atacanaga uwaka n’umutwe wa FDLR. Hari amakuru avuga ko abarwanyi ba FDLR bari kurwana ku ruhande rwa FARDC aribo baciye ruhinga nyuma bakamwiyicira.
Maj Quebec ni umwe mu barwanyi bagereranywaga na nyakwigendera Col Mamadou Ndala wishwe n’abagizi ba nabi. Uyu Majoro Quebec n’izina rihimbano yitiriwe umutwe yayoboraga wahimbwe (Batayo Quebec). Iyi Batayo ikaba yari yarazengereje,inyeshyamba za FDLR mu bice bya Mangina,Muliki na Bwito ni muri Gurupoma ya Bwito ni muri Teritwari ya Rutcshuru mu ntara ya Kivu y’Amajyaruguru/
Ubwo twandikaga iyi nkuru imirwano yari igikomeje aho M23 ihanganiye na FARDC ku gasozi ka Rushari.
Mwizerwa Ally i Bunagana
