Ku gicamunsi cyo kuri uyu wa Mbere tariki ya 1 Kanama 2022, Igisirikare cya Repubulika iharanira Demokarasi ya Congo FARDC cyongeye kugaba ibitero ku birindiro bya M23 i Bukima muri Gurupoma ya Gisigari, Teritwari ya Rusthuru y’Intara ya Kivu y’Amajyaruguru.
Ni igitero kije gikurikira ikindi cyagabwe n’ingabo za Leta kuwa 27 Nyakanga 2022 muri Gurupoma ya Busanza, aho M23 yabashije gusubizayo izi ngabo impande zombi zikajya mu kanya k’agahenge.
Goma 24.com yanditse ko aka gace ka Bukima FARDC yagabye gitero iturutse kari nko mu birometero 5 uvuye ku kigo cya Rumangabo gicumbitswemo n’abarwanyi b’umutwe wa FDLR .
Binavugwa kandi ko abarwanyi ba FDLR kuri uyu wa Mbere baje gufasha ingabo za FARDC kugaba igitero ku birindiro by’umutwe wa M23.
Umutwe wa M23 uherutse gutangaza ko witeguye guhangana n’ibitero mu gihe waba usumbirijwe. Iyi mirwano yubuye kandi mu gihe abaturage baturiye umujyi wa Goma na Butembo bamaze iminsi mu myigaragambyo bamagana ingabo za MONUSCO bazishinja kunanirwa kwirukana umutwe wa M23.
