Abakozi batatu b’ishyirahamwe Oxfam bari barashimuswe kuwa Gatanu w’icyumweru gishize, barekuwe nyuma yo kwigura akayabo k’amafaranga. Aba bakozi bakaba bari bashimutiwe mu gace ka Tundu Mushegereza, muri Gurupoma ya Lemera, mu Bwami bw’Abapfulero, mu Ntara ya Kivu y’Amajyepfo, muri Repubulika ya Demockarasi ya Congo.
Amakuru agera kuri Rwandatribune.com avuga ko, abo bagabo barekuwe, nyuma y’uko hatanzwe akayabo k’amafaranga menshi.
Kurekurwa kw’abo bakozi, ntibivugwaho rumwe na Perezida wa Sosiyete sivile SOCICORDC, kuko ubwo yaganiraga n’itangazamakuru, we yavuze ko barekuwe bagiriwe imbabazi n’abari ba bashimuse, mu gihe bo bavuga ko barekuwe kubera ko biguze!
Uyu muyobozi wa Sosiyete sivile yavuze ibi, mu gihe ashinjwa kuba akorana n’imitwe y’inyeshyamba ikorera mu kibaya cya Rusizi muri ubwo buryo, bikavugwa ko akunze gukingira ikibaba izi Nyeshyamba kuko ayo zibonye ziyagabana nawe.
Amashyirahamwe atandukanye akorera mu bice bya DRC, yasabye leta ya Congo, gukora ibishoboka byose igacungira abaturage umutekano, ngo kuko barambiwe gukorerwa ibikorwa by’ihohoterwa kandi bakabikorerwa Ingabo za Repubulika ya Demokarasi ya Congo (FARDC) ziri hafi zibirebera.
Abaturage bakomeza kwibaza icyo izo ngabo zibamariye mu gihe, bakomeza guhohoterwa abashinzwe kubacungira umutekano ntacyo bibabwiye.
Abo bakozi b’ishyirahamwe rya Oxfam barekuwe ejo kuwa 14 Kanama 2023, ni Prince Bigaba, Archille Ndagano na Mazingi Ndagano.
Uwineza Adeline
