Madamu wa Perezida wa Repubulika Jeannette Kagame yasabye abana bari bitabiriye ihuriro ry’abana bishyurirwa n’imbuto Fondationa bahawe akazina k’imbuto zitoshye, guharanira gukuza no gusigasira intwaro y’ubwenge bafite, birinda ibyabarangaza byose, aho biva bikagera.
Iri huriro ryari rimaze iminsi 4 rikaba ryasojwe kuri uyu wa 14 Nzeri , ni umuhango wari witabiriwe na Madamu wa Perezida wa Repubulika Jeannette Kagame wari umushyitsi mukuru, iri huriro ni irya 13 ry’Imbuto Zitoshye rikaba ryarabereye mu Karere ka Gisagara, muri GS St Bernadette i Save.
Ni ihuriro ryitabiriwe n’abafite imyaka hagati ya 12 na 18.Gahunda ya Edified Generation’ yatangijwe na Madamu Jeannette Kagame muri 2002 hagamijwe kurihira amashuri abana batsinda neza mu ishuri ariko baturuka mu miryango idafite ubushobozi bwo kubabonera ibikenewe ngo babashe kwiga neza.
Umuryango Imbuto Foundation uvuga ko kuva icyo gihe abanyeshuri bagera ku 10,641 b’abahungu n’abakobwa ari bo bamaze guhabwa buruse zo kwiga mu mashuri yisumbuye.
Bimwe mu byaranze iri huriro ry’abanyeshuri harimo ibiganiro byatanzwe n’inzego zinyuranye ndetse no kugira umwanya wo kubaza no gutanga ibitekerezo.
