Umutwe wa M23 washinje FARDC kuba imaze iminsi irasa za Bombe ku baturage batuye mu duce yamaze kwigarurira, igamije kurasa ibirindiro bya M23.
Mu kiganiro amaze kugirana na Rwandatribune.com Major Willy Ngoma umuvugizi wa M23 mubya Gisirikare ,yatangaje ko FARDC imaze iminsi igerageza ku rasa za bombe ku birindiri byayo biherereye mu duce yamaze kwigarurira ,ariko inyinshi muri zo zikagwa mu duce duherereyemo abaturage.
Akomeza avuga ko, nta kintu izo mbombe zangije mu birindiro bya M23 , ahubwo ko zasenye amazu y’Abaturage zikica n’inka nyinshi mu bice byegereye ibirunga bya Sabyinyo,na Bisoke, byumwihariko muri Rangira, Kabindi na Busanza.
Yongeyeho ko, usibye ibyo bice byari bimaze iminsi bisukwaho ibisasu biremereye na FARDC ,Umujyi wa Bunagana ahari ubuyobozi bukuru bwa M23 utekanye ndetse ko wo utigeze uraswaho.
Yagize ati:” FARDC imaze iminsi igerageza kurasa za bombe ku birindiro byacu, ariko izo mbombe ntacyo zangije ku ruhande rwa M23, ahubwo zibasiye abaturage. Hari amazu y’abaturage yasenywe nizo mbombe N’inka nyinshi zirapfa . Gusa usibye ibyo bice umujyi wa Bunagana wo uratekanye, ntago FARDC yabashije kuwurasaho .”
Major Willy Ngoma yanzuye avuga ko, n’ubwo bimeze gutyo M23 izakomeza kurinda abaturage batuye mu duce yamaze kwigarurira ku giciro icyari cyo cyose, ndetse ko nta gitero na kimwe cya FARDC kizashobora gutsinsura M23 mu bice yamaze kwigarurira.
HATEGEKIMANA Claude
Rwandatribune.com
