Gen Maj Peter Cirimwami uheruka kugirwa Guverineri mushya w’Intara ya Kivu y’Amajyaruguru, asimbuye Lt Gen Constant Dima , yatangiye imyiteguro igamije kugaba ibitero kuri M23.
Ni muri urwo rwego Gen Maj Peter Cirimwami, yatangiye gahunda yo gusura ibirindiro byose by ‘Ingabo za Leta FARDC, biherereye mu nkengero z’Umujyi wa Goma, akaba yahereye ku birindiro biri kuri Axe Goma-Kalengera, Goma-Kibumba muri teritwari ya Nyiragongo.
Muri iyo gahunda yo gusura ibirindiro b’Ingabo za FARDC ziryamiye amajanja, Gen Cirimwami, yanakoranye inama yihariye n’Abayobozi ba Brigade ya 41 y’ingabo za FARDC ndetse nyuma ahura n’abasirikare bato aho yabasabye kuzamura morari yabo, mu rwego rwo kwitegura guhangana n’Umutwe wa M23.
Mu ijambo Gen Maj Cirimwami yagejeje kuri abo basirikare, yabawiye ko ari kuzuza inshingano yahawe n’Umuyobozi w’Ikirenga w’Ingabo za FARDC Perezida Felix Thsiekdi ,harimo kureba uko abasirikare biteguye urugamba n’ubwo rwose bari mu gihe cy’agahenge k’imirwanno.
Ati:” N’ubwo muri iyi minsi turi mu gihe cy’agahenge k’imirwano, naje hano gushyira mu bikorwa inshingano nahawe n’Umuyobozi w’ikirenga ndetse na Minisitiri w’Ingabo, kugirango ndebe uko abasirikare biteguye intambara duhanganyemo n’umwanzi . Naje kandi kureba uko muri kwitwara muri iyi minsi, cyane cyane mwe muri mu birindiro byiteguye guhangana n’umwanzi. Bansabye kuza kureba no gushyimangira niba koko mwiteguye urugamba.”
Gen Maj Cirimwami, yasabye Abasirikare ba FARDC, kuba maso bakitegura guhangana na M23, igihe cyose izagerageza kubagabaho ibitero ndetse ko nibiba ngombwa, bagomba kwitegura guhashya uyu mutwe kugeza bawirukanye ku butaka bwa DRC.
Claude HATEGEKIMANA
Rwandatribune.com
