Polisi y’u Rwanda ikorera mu Karere ka Nyagatare yarashe undi musore ukekwaho kuba ari igisambo, nyuma y’amasaha macye harashwe undi musore mu Karere ka Rubavu.
Amakuru dukesha Flash TV, avuga ko uyu musore warasiwe mu Karere ka Nyagatare, yarashwe mu rukerera rwo kuri uyu wa Kane tariki 08 Nzeri 2022.
Uyu musore utaramenyekana imyirondoro bikekwa ko yari umujura kuko bamufatanye televiziyo mu Kagari ka Barija mu Murenge wa Nyagatare.
Ubwo abapolisi bamuhagarikaga, uyu musore yinangiye ahubwo ashaka kwiruka ngo acike inzego, ari na bwo abapolisi bahitaga bamukurikiza isasu.
Uyu musore yarashwe nyuma y’amasaha macye harashwe undi mu Karere ka Rubavu, na we warashwe n’Abapolisi.
Uwarasiwe mu Karere ka Rubavu, yarasiwe mu Kagari ka Kivumu mu Murenge wa Gisenyi nyuma yuko Abapolisi bari ku burinzi basanze ibisambo biri kuniga umuturage biri kumwambura, bigahita byiruka ariko kimwe muri byo kigashaka gutera icyuma abapolisi, bagahita bakirasa.
Polisi y’u Rwanda ikunze kugira inama abaturarwanda kudahangana n’Abapolisi bari mu kazi kabo kuko iyo bibaye, hitabazwa izindi mbaragaza zagira ingaruka ku buzima bwabo.
RWANDATRIBUNE.COM
