Imirwano yahanganishije umutwe w’inyeshyamba wa M23 na FDLR muri Nyiragongo, yarangiye iguyemo Lt.Assouman, aho yicanywe n’abasilikare 6 bari bamurinze.
Isoko y’amakuru ya Rwandatribune ivuga ko ejo ku cyumweru nimugoroba habaye gukozanyaho umwanya muto hagati ya Kompanyi Hilondele y’umutwe wa FDLR/CRAP na M23 mu gace ka Kamayimbwa, muri Teritwari ya Nyiragongo, aho abarwanyi ba FDLR baguye mu gico cyatezwe na M23, maze biza kurangira Lt.Assouman wari ukuriye I Kompanyi Sasheri izwi nka Hilondere akaza guhita ahasiga ubuzima hamwe n’abari bamucungiye umutekano.
Umwe mu baturage baturiye ako gace yabwiye umunyamakuru wacu uri i Goma ko muri ako gace humvikanye amasasu menshi nyuma y’isaha akaza guceceka, mu gitondo cyo kuri uyu wa mbere ubwo abaturage bajyaga kureba icyabaye bagasanga hagaramye abarwanyi ba FDLR barindwi barimo na Lt.Assouman bari basanzwe bazi.
Urupfu rwa Lt.Assouman rwiyongeye kuzindi mfu z’indwanyi nka Lt.Habiyakare wiciwe I Tongo na Lt.Rugero nawe uherutse kurasirwa mu mirwano bose bakaba bari abantu bafite amazina akomeye muri FDLR /CRAP .
Uwineza Adeline
Rwandatribune.Com
