Umutwe w’Inyeshyamba wa M23, wongeye kwerekana izindi mfungwa z’Intambara, zafatiwe k’urugamba muri Teritwari ya Masisi na Nyiragongo.
Ni igikorwa cyabereye i Kavumu kiyoborwa n’Umuvugizi w’ Umutwe w’Inyeshyamba wa M23 mu rwego rw’igisirikare Major Willy Ngoma.
Abasirikare uyu mutwe werekanye ni abo wafatiye mu mirwano yagiye ibahuza n’ingabo zirwana k’uruhande rwa Congo Kinshasa, FARDC, FDLR, Wagner Imbonerakure z’u Burundi na Wazalendo mu Cyumweru gishize, bariya nabafatiwe mu bice bya Teritwari ya Nyiragongo na Masisi.
Mu bafashwe harimo batatu bo mu gisirikare cy’u Burundi, babiri b’igisirikare cya Repubulika ya Demokarasi ya Congo (FARDC), abarwanyi babiri ba Wazalendo ndetse babiri b’umutwe wa FDLR.
Umuvugizi wa M23, Major Willy Ngoma yavuze ko batakabaye berekana ziriya mfungwa z’intambara mu busanzwe zikwiye kurindwa n’amategeko mpuzamahanga arengera ikiremwamuntu, gusa akavuga ko bahisemo kubikora mu rwego rwo “kwereka Isi yose ukuri kw’ibiri kubera muri Congo ndetse n’ikibazo nyacyo gihari.”
Mu basirikare bo Ngabo z’u Burundi berekanwe harimo uwitwa Nzisabira Ferdinand ufite ipeti rya Soldat de 1ère classe na numéro matricule 32200. Uyu musirikare avuga ko abarizwa muri unité ya 221, compagnie ya mbere, akaba yarinjiye mu gisirikare cy’u Burundi muri 2018. Nzisabira avuga ko Igisirikare yacyinjiriyemo mu ntara ya Mwaro.
Undi werekanwe ni umusaza w’imyaka 53 y’amavuko witwa Caporal-Chef Niyongabo Thierry ufite numéro matricule 26202. Uyu musaza wavukiye mu ntara ya Muramvya we avuga ko abarizwa muri unité ya 222, compagnie ya mbere; akaba yarinjiye igisirikare cy’u Burundi mu 1999 mu ntara ya Bururi.
Umusirikare wa gatatu w’u Burundi werekanwe ni 1ére Classe Melance Ndikumana ufite matricule 83678, akaba abarizwa muri unité ya 412 na compagnie ya kabiri. Ndikumana w’imyaka 30 yinjiriye Igisirikare muri 2018, acyinjirira mu ntara ya Makamba, gusa akaba avuka i Mwaro. We na bagenzi be uko bari bambaye imyambaro y’igisirikare cya Congo Kinshasa (FARDC).
Bamwe muri aba basirikare bavuga ko iyi myambaro bayiherewe i Bujumbura, mbere yo kurira indege yabahavanye bo n’abandi babarirwa muri 50 ibajyana i Goma.
Nzisabira yavuze ko we na bagenzi be bavuye i Burundi nta mbunda bafite, ko ahubwo bazihawe bageze i Goma.
Uyu musirikare avuga ko nyuma yo guhabwa imbunda za FARDC, we na bagenzi be bahawe misiyo yo “kujya i Kilorirwe (muri Masisi) kurwanya inyeshyamba za M23.”
Caporal-Chef Niyongabo we avuga ko yinjira muri Congo, yanyuze i Bukavu n’imodoka, ari na ho yambikiwe impuzankano ya FARDC ndetse agahabwa n’imbunda.
Uyu na bagenzi be bo ngo basabwe kwerekeza i Kitchanga muri Masisi “kurwanya inyeshyamba za M23.”
Inyeshyamba za FDLR zerekanwe harimo uwitwa Baraka Shukuru winjiye muri uwo mutwe afite imyaka 15 y’amavuko, na mugenzi we witwa Emmanuel Samehe wawinjiyemo muri 2017.
Baraka uvuga ko yavukiye i Mudende mu karere ka Rubavu, avuga ko se umubyara ari we wamwinjije muri FDLR nyuma yo kumwambukana muri Congo akiri umwana muto cyane.
Mugenzi we na we avuga ko yavukiye mu karere ka Rutsiro, na we akaba yarinjiye muri FDLR na se nawe usanzwe muri uwo mutwe.
Aba basirikare bahuriza ku kuba bose uduce boherejwemo barahabwaga misiyo imwe yo kurwanya Abavuga ururimi rw’Ikinyarwanda bari muri Congo, Iki gikorwa cyabaye ejo kuwa 13 Ugushyingo 29023.
Uwineza Adeline
Rwandatribune. Com
