Ihuriro ry’imitwe y’inyeshyamba yibumbiye mu kiswe Wazalendo yasubiranyemo, ipfa gukusanya imisoro itemewe iva ku musaruro w’ibiribwa biva mu mirima ya Kyasenda.
Iyo mitwe ibiri igize Wazalendo yasubiranyemo, umwe uyoborwa n’uwiyita Commanda Rouge , undi ukayoborwa na Kasuka.
Ni imirwano yabaye kuri uyu wa 26 Ugushyingo 2023, ahagana mu masaha ya saa kumi n’imwe z’igitondo ibera mu mujyi wa Kibirizi. Ubwo barasanaga umwe mu bagize umutwe wa PMF yafashwe n’amasasu ajyanwa ku bitaro
Kivu Morning Post dukesha iyi nkuru yatangaje ko barasaniye ahari inkambi y’umutwe w’inyeshyamba witwaje intwaro wa Nguluma ku gasozi katari kure y’ibitaro bikuru bya kibirizi, muri sheferi ya Bwito muri Teritwari ya Rutshuru.
Uwatanze amakuru yakomeje avuga ko”Hashize igihe kinini imitwe ibiri irimo uyoborwa na Commanda Rouge n’undi uyoborwa na Kasuka irwanira kuyobora agace bakusanyirizamo imisoro itemewe ituruka ku musaruro w’ibiribwa biva mu mirima ya Kyasenda.”
Iyo mirwano yamaze iminota 20 irahoshyorora.Gusa Abaturage batuye mu Kibirizi bavuga ko iyo mirwano hagati y’iyo mitwe yombi ya Wazalendo ibaye inshuro zirenga eshatu bapfa iyo misoro.
Adeline Uwineza
Rwandatribune.Com
