Ambasaderi w’u Bufaransa mu Rwanda n’uhagarariye Igisirikare cy’u Bufaransa mu Rwanda, bakiriwe na Minisitiri w’Ingabo z’u Rwanda, Maj Gen Albert Murasira.
Ni amakuru dukesha ubuyobozi bw’Ingabo z’u Rwanda, mu itangazo bwashyize hanze aho bwavuze ko Gen Murasira yakiriye uyu mudipolomate w’u Bufaransa kuri uyu wa Gatanu tariki 16 Nzeri 2022.
Bwagize buti “Minisitiri w’Ingabo, Maj Gen Albert Murasira yakiriye mu biro bye ambasaderi w’u Bufaransa mu Rwanda, nyakubahwa Antoine Anfré. Yari aherekejwe n’uhagarariye inyungu za gisirikare mu Rwanda, Col Nicolas Dufour. Baganiriye ku buryo bwo guha ingufu imikoranire isanzweho mu by’ingabo.”
Muri Werurwe uyu mwaka wa 2022, Umugaba Mukuru w’Ingabo z’u Rwanda, Gen Jean Bosco Kazura yagendereye u Bufaransa.
Icyo gihe yakiriwe na mugenzi we; Umugaba Mukuru w’Ingabo z’u Bufaransa, Gen Thierry Burkhard; bagirana ibiganiro byagarutse ku bibazo by’umutekano muri Afurika yo hagati n’iy’amajyepfo ndetse n’imikoranire hagati y’ingabo z’Ibihugu byombi.
RWANDATRIBUNE.COM
