Mu Burasirazuba bwa Congo, tumwe mu duce n’imidugudu yo muri Gurupoma ya Bashali Mokoto, ubu biri mu maboko y’inyeshyamba za M23.
Ni nyuma y’urugamba rwayihuje n’igisirikare cya FARDC na Wazalendo ku wa Kane, itariki 21 Werurwe 2024, nyuma ya saa sita, muri Centre ya Kirumbu, muri Sheferi ya Bashali, yo muri Teritwari ya Masisi, muri Kivu y’Amajyaruguru dore ko yari yatangiriye muri Centre ya Minova muri icyo gitondo
Amakuru dukesha Isoko ya Rwanda Tribune Tv, avuga ko inyeshyamba za M23 mbere yo gushoza intambara ku murwa mukuru wa Kirumbu babanje kwibasira ibirindiro bya Wazalendo biri ahitwa Kalengera, mu kirometero uturutse Kirumbu.
Inyeshyamba za M23 kandi nyuma yo kwigarurira Kirumbu, zakomereje i Kalengera, aho ngo zagundaguranye n’aba Wazalendo bari bihagazeho ariko bikarangira amaguru bayabangiye ingata berekeza mu misozi yitegeye aka karere.
Kuri ubu imwe mu midugudu byemejwe ko yafashwe ni Kirumba, Gyagoro na Kalengera.
Ubu iyo mirwano ngo ikomereje Bweru, mu gihe abaturage bamwe bo mu bice byafashwe bari bahungiye mu bihuru ariko bakaba basubiye mu ngo zabo mu kinyamugoroba.
Umutekano ukaba wagarutse muri centre ya Kalengera na Kirumbu uretse urusaku rw’amasasu yumvikana yo gupfupfunura umwanzi mu bwihisho.
Florentine Icyitegetse
Rwandatribune.com
