Kuri uyu wa 27 Nzeri 2022, Indege yo mu bwoko bwa Kajugujugu y’Intambara y’ingabo za Uganda ziri mu butumwa bwo kurwanya ADF yakoreye impanuka hafi y’umupaka uhuzi RDC na Uganda.
Iyi ndege yakoze impanuka ni iyo mu bwoko bwa MI 24 Jet, ikaba yakoreye impanuka muri Lokarite ya Kabarore kari hafi y’umupaka wa Uganda muri Gurupoma ya Basongora ,teritwari ya Beni mu ntara ya Kivu y’Amajyaruguru.
UPDF yatangaje ko icyateye iyi mpanuka ari uko iyi Kajugujugu yagize ibibazo mu mikorere ya Moteri , bituma igira ibibazo ry’imikorere byayigejeje ku kwitura hasi.
Indege zo mu bwoko bwa MI 24 zikoreshwa n’igisirikare cya Uganda zikorwa n’Uburusiya. Iyi ni indege yo muri ubu bwoko ya 3 ya UPDF iguye kuva muri 2021. Iheruka gukora impanuka ni iyaguye mu gace ka Kaasi mu burengerazuba bw’Igihugu cya Uganda.
Ingabo za Uganda ziri mu bikorwa byo kurwanya umutwe wa ADF kuva mu Ugushyingo 2021, Ibi bikorwa bya Gisirikare zifatanije n’ingabo za RD Congo byahawe izina rya Operasiyo Shujaa. Ibi bikorwa bya Gisrikare bihuriweho bikorerwa muri Teritwari za Irumu na Mambasa, muri Ituri, na Beni yo mu ntara ya Kivu y’Amajyaruguru.
