Ubwo perezida Piérre Nkurunziza yafataga icyemezo cyo kongera kwiyamamaza mu mwaka wa 2015, ni bwo mu Burundi habaye imivurungano ari nayo yaviriyemo bamwe mu Barundi guhungira muri Repubilika Iharanira Demokarasi ya Congo.
Impunzi z’Abarundi ziri mu nkambi ya Lusenda zigenda zikorerwa ihoterwa ritandukanye nk’uko abashinzwe impunzi muri Repubulika ya Demokarasi ya Congo babivuga ndetse bakanihanangiriza abarwanyi ba wazalendo bagaragaraho ibyo bikorwa kuzibukira impunzi z’Abarundi.
Komisiyo y’Igihugu ishinzwe Impunzi muri Repubulika Iharanira Demokarasi ya Congo, yategetse abarwanyi ba Wazalendo kudakomeza kwambura no gusagarira impunzi z’Abarundi ziri mu burasirazuba bw’iki gihugu.
Impunzi z’Abarundi ziri mu Nkambi ya Lusenda iri hafi y’umujyi wa Bukavu, zihora zinubira guhohoterwa na Wazalendo, aho bamwe bavuga ko badahwema gusoreshwa amafaranga menshi, bakamburwa umusaruro bakuye mu mirima, abandi bakabakoresha imirimo y’amaboko ku gahato nko kuvoma n’ibindi.
Ibi ni ibyatangarijwe mu nama yateguwe na Komisiyo y’Igihugu ishinzwe Impunzi yabereye muri iyi nkambi, Wazalendo yabujijwe gukomeza gusagarira izi mpunzi, gusoresha no kubambura ibyabo ku gahato.
Iyi nama kandi yafatiwemo icyemezo cyo kubuza Wazalendo n’Igisirikare cya FARDC gukomeza kuzengurukana intwaro muri iyi nkambi uretse gusa igipolisi gishinzwe umutekano w’izi mpunzi.
Mu myaka ya 2020 na 2021 abagizi ba nabi bitwaje intwaro bikekwa ko ari abagize umutwe w’abarwanyi wa Mai-Mai, bagiye binjira muri iyi nkambi bakica impunzi, bagasahura inka n’ihene ndetse n’amafaranga.
Inkambi ya Lusenda ikaba icumbikiye impunzi zisaga ibihumbi 30.
N’ubwo bimeze bityo, igihungu berekejemo, RDC ni mu ndiri y’imitwe yitwaje intwaro ibangamira ubuzima bw’abaturage b’abasivile dore ko kibarizwamo imitwe igera kuri 30 irimo n’umutwe witerabwoba wa FDLR.
