Ubushinjacyaha bwa Gisirikare bwasabye umucamanza uburanisha urubanza rw’abasirikare barimo aba-Colonel 2 ba FARDC bashinjwa gufasha M23 kwigarurira umujyi wa Bunagana, guhamagaza Gen Peter Cirumwami wari Komanda wabo nk’umutangabuhamya.
Ni urubanza rwatangiye kuburanishwa none kuwa 20 Ukwakira 2022, n’Urukiko rwa Gisirikare mu Ntara ya Kivu y’Amajyaruguru. Mu rukiko abunganira aba basirikare babiri basabye ko abo bunganira baburana bari hanze,kuko nta mpamvu n’imwe ubushinjacyaha bufite gutanga zatuma batoroka igihugu.
Aba basirikare baburana ni Col Désiré Lobo na Col Jean-Marie Diadia wa Diadia bari bakuriye imitwe y’ingabo. Ubushinjacyaha bwa Gisirikare bubarega ibya bine kuri buri umwe aribyo : Guhunga imbere y’umwanzi,Guta imbunda n’amasasu,Kurenga ku mabwiriza ya Gisirikare no Kwigabiza ibya rubanda.
Mu iburanisha rya Mbere aba bombi bahakana ibyaha baregwa , bakemeza ko ubushinjacyaha nta bimenyetso bibashinja bafite , ari naho bahera basaba kuburana bari hanze.
Ubushinjacyaha kandi bwasabye ko mu batangabuhamya bukeneye ko batanga ubuhamya muri uru rubanza, hagomba kongerwamo Gen Major Peter Cirumwami wari Komanda wa Socola 2 aba basirikare babarizwagamo ubwo M23 yigaruriraga umujyi wa Bunagana.
Umucambanza yanzuye ko ubusabe bw’aba basirikare 2 basabaga kuburana bari hanze nta shingiro bufite, ndetse anasubika urubanza. Iburanisha rikurikira riteganijwe kuwa 26 Ukwakira 2022.
