Ubuyobozi bw’igisirikare cya Uganda (UPDF) buratangaza ko iki gisirikare kishe abarwanyi 11 b’umutwe wa ADF bagabye igitero muri Uganda baturutse muri Repubulika Iharanira Demokarasi ya Congo.
Ni igitero cyabaye mu ijoro ryacyeye aho abarwanyi ba ADF bagabye igitero muri Uganda bambukiye ku mugezi wa Semuliki uherereye mu Karere ka Ntoroko.
Ubuyobozi bwa UPDF, bwashyize hanze itangazo ritanga amakuru kuri iki gitero, nkuko turikesha umuvugizi w’iki gisirikare.
Iri tangazo rigira riti“Abarwanyi babarirwa hagati ya 20 na 30 ba ADF mu ijoro ryatambutse bambutse umugezi wa Semuliki muri Kyanja mu Karere ka Ntoroko. Ubutasi bwacu bwahise bubavumbura barahagarikwa.”
Iri tangazo kandi rivuga ko UPDF yahise yica abarwanyi 11 muri aba bari bagabye igitero ndetse igafata mpiri abarwanyi umunani muri abo n’ibikoresho bya gisirikare birimo imbunda 10 zo mu bwoko bwa SMGs.
RWANDATRIBUNE.COM
