Nyuma yuko umutwe w’abakomando ba M23 wivuganye Maj. Nshimiyimana Gavana wari Komanda mukuru w’umutwe RUD-Urunana, M23 yagaragaje ibikoresho byinshi byiganjemo imbunda yasanze mu birindiro by’uyu murwanyi mukuru wa RUD-Urunana.
Ni ibikoresho byaganjemo imbunda z’intambara zo mu bwoko bwa AK 47 ndetse n’imbunda zirasa ibisasu biremere, hakaba harimo kandi ibikoresho bakoreshaga mu itumanaho bizwi nk’ibyombo.
Umunyamakuru wacu uri Kiwanja, wadutangarije iby’urupfu rwa Major Nshimiyimana Cassien uzwi ku mazina ya Gavana, yatubwiye ko yicanywe n’abandi abarwanyi icyenda (9) babarizwaga mu mutwe wa CRAP wa RUD-Urunana.
Major Nshimiyimana Cassien alias Gavana, ni we wagabye igitero mu Murenge wa Kinigi mu Karere ka Musanze cyanahitanye abaturage batari bacye.
Imirwano yahitanye uyu murwanyi, cyatangiye ku isaha ya saa Saba ubwo abakomando ba M23, binjiraga mu birindiro by’umutwe wa RUD-Urunana bagatangira kurasana kugeza ubwo uwari ukuriye umutwe wa RUD-Urunana yaje guhita yicwa na mudahusha wa M23.
RWANDATRIBUNE.COM
