Umugaba Mukuru w’Ingabo za Mozambique, Admiral Joaquim Mangrasse yasuye inzego z’umutekano z’u Rwanda ziherutse koherezwa mu Karere ka Ancuabe mu Ntara ya Cabo Delgado guhashya ibyihebe.
Ni igikorwa cyabaye kuri uyu wa Gatanu tariki 23 ukuboza 2022, aho Admiral Joaquim Mangrasse yakiriwe n’Umuyobozi w’Inzego z’Umutekano z’u Rwanda ziri mu butumwa muri Mozambique, Maj Gen Eugene Nkubito.
Uyu Mugaba Mukuru w’Ingabo za Mozambique, Admiral Joaquim Mangrasse yashimiye byimazeyo inzego z’umutekano z’u Rwanda ku byo zimaze kugeraho ubu byatumye amahoro n’umutekano byongera gusagamba.
Aba basirikare ba RDF boherejwe mu Karere ka Ancuabe, ni icyemezo cyaturutse mu buyobozi Bukuru bw’Ibihugu byombi, mu rwego rwo kujya guhashya ibyihebe byahungiye mu bice by’amajyepfo y’Intara ya Cabo Delgado.
Perezida Paul Kagame w’u Rwanda aherutse kugaruka ku butumwa bw’ingabo z’u Rwanda muri Mozambique ari na bwo yahishuye ko u Rwanda rwari rugiye kohereza izindi ngabo.
Yavuze ko izo ngabo zizaba zigiye guhashya ibyihebe byagiye bihunga mu bice byirukanywemo n’ubundi n’Ingabo z’u Rwanda, bikajya kwihisha mu bindi bice.
RWANDATRIBUNE.COM
