Perezida wa Repubulika Iharanira Demokarasi ya Congo, Félix Tshisekedi yakiriye Major General Jeff Nyagah uyoboye ingabo z’itsinda rya EAC ziri mu butumwa muri DRC, zinaherutse gushyikirizwa agace ka Kibumba n’umutwe wa M23.
Perezida Tshisekedi yakiriye uyusirikare w’Umunyakenya Major General Jeff Nyagah, kuri uyu wa Kane tariki 29 Ukuboza 2022, bagirana ibiganiro.
Ni ibiganiro byagarutse ku ishusho y’uburyo umutekano wifashe muri Kivu ya Ruguru nyuma yuko ingaba z’Umuryango wa Afurika y’Iburasirazuba zigiye mu butumwa muri iki Gihugu.
Tshisekedi yakiriye uyu Mujenerali nyuma y’icyumweru kimwe ashyikirijwe agace ka Kibumba n’umutwe wa M23 mu muhango wabaye ku wa Gatanu w’icyumweru gishize tariki 23 Ukuboza 2022.
Bahuye mbere y’umunsi umwe kandi izi ngabo ziri mu butumwa bw’Umuryango wa Afurika y’Iburasirazuba, zikongera kugirana ibiganiro n’uyu mutwe wa M23 uherutse kubyitangariza.
Nubwo hakomeje kugaragara intambwe yo kurangiza ibibazo muri Repubulika Iharanira Demokarasi ya Congo, iki Gihugu cyo gikomeje kugenda biguruntege kuko no mu gitondo cya kare kuri uyu wa Gatanu FARDC ndetse n’imitwe iri kuyifasha mu rugamba, bagabye igitero kuri M23 mu gace ka Bwiza gaherereye muri Teritwari ya Rutshuru, mu gihe uyu mutwe wo wari ukomeje kubahiriza ibyo wasabwe birimo guhagarika imirwano.
RWANDATRIBUNE.COM
