Fezza Mulalo wari umwe mu bayobozi bakuru ba ADF aheruka kwicwa n’ingabo za UPDF na FARDC mu kiswe Operasiyo Shuja igamije kurwanya no kurandura uyu mutwe.
Ni amakuru yatanzwe n’umwe mu barwanyi ba ADF bari bashinzwe kumurindira umutekano, uheruka gutabwa muri yombi kuwa gatanu tariki ya 10 Werurwe 2023.
Aya makuru ,akomeza avuga ko Fezza Mulalo yarasiwe mu gitero cyagabwe n’ ingabo za UPDF na FARDC ku mutwe wa ADF kuwa 27 Gashyantare 2023 ,mu gace ka Mwalika ho muri teritwari ya Beni.
Fezza Mulalo yari umuyobozi mukuru w’urwego rwa Politiki mu mutwe wa ADF akaba na comanda w’abarwanyi ba ADF muri segiteri ya Ruwenzori no mu kibaya cya Mwalika.
Usibye kuba ariwe wari ukuriye urwego rwa politiki muri uyu mutwe , Fezza Mulalo yanafatwaga nka nimero ya gatatu mu gisirikare cy’inyeshyamba za ADF.
Ni umwe mu bayobozi ba ADF bari bamaze igihe bahigishwa uruhindu , kubera ibyaha byindengakamere uyu mutwe ushinjwa birimo kwica urwagashinyaguro no gushimuta abaturage b’inzirakarenga mu burasirazuba bwa DRC.
