Imirwano yahanganishije umutwe wa CODECO n’uwa FPIC mu nkengero za Bunia mu Ntara ya Ituri muri Repubulika Iharanira Demokarasi ya Congo, yaguyemo abantu bagera muri 19 abandi benshi barakomereka.
Ni imirwano yabaye kuri uyu wa Kabiri tariki 25 Mata 2023 nyuma yuko hari indi yabaye kuva 23 Mata 2023 mu duce twishi two mu nkengero za Bunia mu Ntara ya Ituri.
Iyi yabaye kuri uyu wa Kabiri tariki 25 Mata, yahanganishije iyi mitwe ibiri ya CODECO n’uwa FPIC muri Teritwari ya Bebe-Lebe na Baboa-Bokoe mu gace ka Irumu.
Nk’uko amakuru aturuka muri ako gace abitangaza ko mu duce turimo kuberamo imirwano, abaturage bakomeje kwicwa ndetse no kuhaburira imitungo yabo ikomeje kwibwa n’izo nyeshyamba.
Umuyobozi wo muri aka gace avuga ko imirwano yatangiye ku Cyumweru ahagana mu ma saa yine za mu gitondo ikomeza no ku wa Mbere umunsi wose ikaba yakomeje no kuri uyu wa Kabiri mu gitondo.
Amakimbirane yagaragaye hagati y’abayobozi b’inyeshyamba za CODECO n’uw’iza FPIC niyo yabaye intandaro y’iyo mirwano.
Iyi mirwano, ku munsi wa gatatu ikurikiranye, imaze guhitana abantu 19 mu bice bitandukanye, aho muri Kunda imaze guhitana abantu 8, muri Chekeleke baka batanu, muri Mwanga bakaba batatu naho muri Magalabo bakaba ari batatu.
Jessica MUKARUTESI
RWANDATRIBUNE.COM
