Kuri uyu wa mbere tariki 30 ukuboza 2019, Urukiko rwisumbuye rwa Nyarugenge rwasubitse urubanza ruregwamo abayisilamu batanu, bakekwaho ibyaha birimo icy’iterabwoba, nyuma y’uko ubushinjacyaba bugaragarije ko butabonye inyandiko z’ubujurire z’abunganira abaregwa.
Ku itariki ya 3 Ukuboza 2019, nibwo urukiko rw’ibanze rwa Kagarama rwari rwategetse ko abayisilamu batanu baregwa ibyaha bifitanye isano n’iterabwoba bafungwa iminsi 30 y’agateganyo.
Abaregwa ni Rumanzi Amran, Nizeyimana Yazid, Kabendera Abdallah, Uwimana Justin Omar na Rurangwa Ibrahim.
Aba bagabo uko ari batanu bakurikiranyweho ibyaha birimo kugirira nabi ubutegetsi buriho cyangwa Perezida wa Repubulika, icyaha cyo kujya mu gaco k’ubwigomeke ndetse n’icyaha cy’iterabwoba rishingiye ku nyungu z’Idini.
Urukiko rw’ibanze rwa Kagarama rwavuze ko ibi byaha byose aba bagabo babikoze ubwo bari mu mutwe witwa “Hizbu -Ut- Tahrir”, binjiyemo mu 2012, nyuma y’ubushakashatsi bw’uwitwa Rumanzi Amran yakoze, agatangira kurishishikariza abandi bose bagamije gufata ubutegetsi binyuze mu biganiro.
Urukiko kandi rwavuze ko bose biyemereye ko bateraniye mu ngo zabo ubwabo bari gukora ubushakashatsi kuri iryo shyaka riharanira kwibohora, banariganiraho nta ruhushya rw’ubuyobozi bwa leta cyangwa ubw’idini ya Islam bahawe.
Nyuma y’uko urukiko rufashe umwanzuro w’uko bafungwa iminsi 30 bakaburana bafunzwe, abaregwa bahise bajurira mu rukiko rwisumbuye rwa Nyarugenge.
Abaregwa bo biregura bavuga ko batari muri uyu mutwe ko ndetse nta nama bakoze kuko ibyo bakoze ari ibyicaro byiga ku idini ya Islam, bakavuga ko izo nyigisho zari izo muri Qoran.
Kuri uyu wa Mbere, mu rukiko habonetse abaregwa bane nyuma y’aho umwe muri bo witwa Rurangwa Ibrahim atigeze ajurira.
umucamanza yahaye umwanya abaregwa, ababunganira mu mategeko barimo Me Mbonyimpaye Elias bavuze ko biteguye kuburana.
Gusa ariko uruhande rw’Ubushinjacyaha rwo rwavuze ko rutiteguye kuburana kuko ngo inyandiko y’ubujurire butigeze buyibona.
Abunganira abaregwa bavuze ko ubushinjacyaha burimo gushaka gutinza urubanza, kuko inyandiko y’ubujurire bayishyize mu ikoranabuhanga cyangwa “système”, bose bahuriraho ku tariki 10 Ukuboza uyu mwaka, bivuze ko imaze muri iryo koranabuhanga iminsi 20.
Nyuma y’akanya gato, umucamanza yemeje ko iri buranisha ku ifungwa n’ifungurwa rishyizwe tariki 7 Mutarama 2020 saa mbiri za mu gitondo.
Abaregwa bose uko ari batanu batawe muri yombi bamwe muri Nyakanga abandi muri Kanama uyu mwaka, bane bakaba batuye mu Karere ka Kicukiro naho undi umwe akaba atuye mu Karere ka Bugesera.
NYUZAHAYO Norbert
