Amakuru aturuka muri DRC ,avuga ko hugera ejo kuwa 15 Mutarama 2023 umutwe wa M23 watangiye kuva mu tundi duce wigaruriye muri Teritwari ya Rutshuru.
Aya makuru yemejwe n’Abaturage batuye muri Teritwari ya Rutshuru aho babwiye radiyo Okapi ko Abarwanyi ba M23 ,batangiye gusubira inyuma bahereye mu gace ka Kiwanja guhera ejo, bakomereza mu bindi bice birimo Nyamilima, Buramba na Kisharu kuri uyu wambere.
Ku geza ubu ariko, Umutwe wa M23 nturatangaza k’umugaragaro ko wavuye muri utwo duce, gusa Sosiye sivile ikavuga ko Abarwanyi ba M23 bari kuva muri utwo duce berekeza ahitwa Kahunga mu majayaruguru ya Kiwanja-Kanyabayonga abandi berekeza mu mjyepfo ya Rutshuru.
Biravugwa kandi ko M23 yavuye no mu gace ka Bwiza yerekeza mu tundi duce twa Bishusha na Tongo bivugwa ko yahakusanyirije abarwanyi benshi.
k’urundi ruhande ariko, hari impungege zigaragazwa n’Abaturage bo muri Rutshuru y’uko M23 iri kuyobya uburari kuko abarwanyi bayo bose batarava muri utwo duce .
Ibi biravugwa mu gihe MONUSCO mu mpera zicyumwe gishize , iheruka kwibutsa M23 ko itariki yo kuba yavuye mu bice byose yigaruriye ari kuwa 15 Mutarama 2023.
Ibi kandi ,byanakomojweho na Perezida Tshisekedi mu kiganiro yagiranye kuri Telefone na Antony Blinken Umunyamabanga wa USA ushinzwe ububanyi n’amahanga.
Imyanzuro ya Luanda, iteganya ko Umutwe wa M23 ugomba kuba wavuye mu bice wigaruriye bitarenze kuwa 15 Mutarama 2023.
Mu kiganiro yagiranye na Rwandatribune.com, Maj Willy Ngoma umuvugizi wa M23 mubya gisirikare yaciye amarenga avuga ko M23 iri mu myiteguro yo kuva mu bindi bice, mu rwego rwo gukomeza gushyira mu bikorwa imyanzuro ya Luanda na Nairobi kugirango ikibazo bafitanye n’Ubutegsi bwa DRC gikemuke binyuze mu nzira y’Amahoro.
icyakora ,Maj Willy Ngoma yirinze gutangariza Rwandatribune.com igihe icyo gikorwa cyizabera.
