Imirwano yongeye kubura mu gace ka Bunagana hagati ya M23 na FARDC, ibisasu bikaba byongeye guterwa ku butaka bw’u Rwanda aho kimwe cyongeye kugwa mu Kinigi mu Karere ka Musanze.
Imirwano ihanganishije ingabo za Leta ya Congo n’umutwe wa M23 yongeye kubura muri iki gitondo aho ingabo za Leta zifatanyije na FDLR zabyutse zirasa kumutwe M23 mu birindiro byawo biri ahirwa Canzu na Runyoni.
Isoko y’amakuru ya Rwandatribune iri mu Murenge wa Kinigi mu Karere ka Musanze, ivuga ko igisasu kimaze kugwa ahitwa mu Rushubi hafi ya Kiliziya Gatolika ariko kikaba nta bintu cyangije.
umwe mu baturage batuye muri uyu murenge wa Kinigi, yabwiye Rwandatribune ko mu gitondo cyo kuri uyu wa Gatanu amasasu yakomeje kivugira mu ishyamba ry’Ibirunga.
Leta y’u Rwanda ntacyo itatangaza kuri iki gikorwa cy’ubushotoranyi cyongeye gukorwa n’ingabo za Repubulika Iharanira Demokarasi ya Congo.
Twashatse kuvugisha Umuyobozi w’Akarere ka Musanze, Bwana Lamuri Jeanvier ntibyadukundira kugeza ubwo twandikaga iyi nkuru.
Ally MWIZERWA
RWANDATRIBUNE.COM
