Mu ijoro ryatambutse i Goma muri Repubulika Iharanira Demokarasi ya Congo, haraye humvikana urusaku rw’amasasu, mu mirwano ikarishye yashyamiranyije ingabo za Leta (FARDC) n’abarwanyi ba Wazalendo.
Isoko y’amakuru ya Rwandatribune iri mu mujyi wa Goma yemeza ko imirwano yatangiye mu masaha ya saa mbiri z’ijoro (20:00’), ubwo abasirikare ba Leta bashakaga kwinjiza muri Gereza ya Munzenze abarwanyi ba Mai-Mai Nyatura, baregwaga ibyaha byo guhohotera abaturage.
Umutangabuhamya wabyiboneye n’amaso avuga ko bitashobotse ko abo barwanyi binjizwa mu Munzenze ahubwo bambuye abasirikare imbunda batangira kuzibarasisha.
Muri Ako kanya abasirikare babiri ba FARDC babarizwa mu ishami rya Mmilitaire bahise bicwa, undi umwe arakomereka.
Uyu mutangabuhamya avuga ko Ingabo za Leta zabashije gukizwa n’amaguru, mu gihe hari andi makuru yavugaga ko imirwano igikomeje hagati ya Mai-Mai zishyigikiwe n’abaturage ndetse n’ingabo za Leta.
Ubwo twandikaga iyi nkuru nta ruhande rwari rwagize icyo rubitangazaho, gusa turakomeza gukurikirana iby’iyi mirwano.
RWANDATRIBUNE.COM
