Umuhari RED-Tabara urwanya reta y’Uburundi y’umugambwe CNDD-FDD uremanga ko ariwo wagavye igitero muri zone Buringa, Komine Gihanga intara ya Bubanza kuri uno wagatandatu itariki 02/9/2023. Nkuko bigaragara mw’itangazo uyo muhari wasohoye, wamenyesheje ko biteguriye kugaba ibitero aho ariho hose, kandi umwanya uwariwo wose.
Mubasize ubuzima muri ico gitero cagabwe na RED-Tabara bamaze kumeneyekana ni 2, umugore n’umugabo bahiriye mumodoka yo mubwoko bwa Probox yatewe Roketi ica irasha irarangira.
Uwundi umwe w’umugabo yari muri iyo modoka nyene yarashwe amasase 3, kukuguru, mumugongo no mwitako agerageza guhunga. Inyuma y’igitero akaba yaciye ajanwa kwa muganga.
Ejo nyene mw’ijoro abasirikare bakaba baciye begeranya ibisigarira vy’iyo modoka yaturiwe barabipakira barabitwara. Mugitondo c’uno musi kuw’ Imana ntamuntu numwe yari yemerewe kwegera ahabereye ico gitero. Hakaba hari hakijwe n’abasirikare n’abapolisi benshi.
Freddy Nkurunziza
