Mu rukerera rwo kuri 25 Mutarama 2024, mu Burundi, muri komine Bukinanyana mu ntara Cibitoki, mu ishyamba rya Bumba hafi na Kibira hatoraguwe imirambo itatu y’abapolisi bivugwa ko bishwe n’abantu bataramenyekana.
Amakuru rwandatribune.com ikesha isoko yayo iri Bukinanyana avuga ko aba bapolisi bishwe mu mishyamirano yahuje inyeshyamba za FLN ziba mu mu ishyamba rya Kibira bakaba barapfaga inzoga bari basahuye kuma kabari yo muri ako gace, maze kuzigabana bigatera amahane maze abo muri FLN bakarasa abo bapolisi.
Abaturage batuye mu gace kabereyemo iyo mishyamirano bavuga bafite ubwoba bwo kuba bagirirwa nabi isaha ku isaha kubera urujya n’uruza rw’abapolisi n’ingabo z’u Burundi bakomeza kubona ziyongera muri ako gace nyuma y’uko n’ubundi hari hazanywe intwaro ziremereye, bakavuga ko bashobora guhungira imbere mu gihugu kubera umutekano mukeya uri kugaragara muri ako gace ka Bukinanyana.
Abategetsi b’u Burundi bakaba bataragira icyo bavuga kuri ubu bwicanyi bwakorewe aba bapolisi.
Bikaba biteganyijwe ko bazashyingurwa ku munsi wejo ku wa gatandatu tariki 27 Mutarama 2024.
Mucunguzi Obed
Rwandatribune.com
