Ishyirahamwe rishinzwe gutabariza Abarundi bari mu kaga (FOCODE) riyobowe na Pacifique Nininahazwe naryo ryatanze impuruza ku ngabo z’u Burundi ziri gupfira gushira mu mirwano igisirikare cya leta ya Congo, gihanganyemo n’ umutwe w’inyeshyamba za M23, mu Burasirazuba bwa Repubulika ya Demokarasi ya Congo.
Umwe muri aba basirikare b’u Burundi bahanganye n’umutwe wa M23, aganira na Pacifique Nininahazwe yagize ati: “Turagusabye wongere volume, udutabarize; hano muri RDC turi mu ntambara iturenze. Ikindi nti tukibona amafranga yacu, duheruka guhembwa mu kwezi kwa Kabiri. Ubundi twahoraga tuyaronka ku kwezi ku kwezi. Ubuho ntituzi uwabyitambitse imbere. Gusa bivugwa ko leta ya Kinshasa yanze kuyatanga kubera ko M23 idukubita.”
Ubutumwa bw’ uyu musirikare w’u Burundi bunavuga ko amagorwa barimo muri Repubulika ya demokarasi ya Congo ashobora kuzavamo ingorane zikomeye mu gihugu cy’u Burundi no mu karere.
Undi musirikare nawe yakomerejeho agira ati: “Turagukurikirana cyane cyane, kandi burya n’abatagukunda bazi ko uvuga ibyukuri. Njyewe ndi umusirikare ndi muri RDC kandi sindi muto mu mpande zose, haba mu kazi nfite ibyo mpagarariye, kandi n’imyaka si mike.
Rero ibibazo turimo muri iki gihugu cya Congo, twebwe twubaha indahiro twarahiye, tukubaha ijwi ry’abenegihugu ryo ryashizeho Perezida, Nawe akadutuma. Mu byo mwagiye mutanga uburyo ibintu byifashe hano, harimo bike ababaha amakuru bahabwa ariko kandi harimo n’ukuri kwinshi.
Turi gupfira mu Burasirazuba bwa Repubulika ya demokarasi ya Congo, ku buryo budasanzwe, abana bacu bakirukanwa ku mashuri, nk’aho turi gukorera Inyeshamba, kandi tuzi neza ko hariho indemnite de guerre yagombaga kugezwa mu miryango yacu. N’uwo dutelefonye ngo atugurize tuzamwishure nyuma, akadusubiza avuga ko no mu busanzwe tutazi ko tuzagaruka, akavuga muri ubwo buryo tuzayamuhera hehe?”
Sibi byonyine aba basirikare barigucamo, kuko bagaragaje ko bafite n’inzara iri ku rwego rwo hejuru, ndetse ko bagera aho bibaza niba koko Perezida w’u Burundi n’umugaba mukuru w’Ingabo z’igihugu cyabo biyumvira ko aba basirikare bari mu mirwano badafungura, cyangwa byibuze ngo batekereze ku muryango yabo.
Ubu butumwa bukomeza buvuga ko irindi kosa ubutegetsi bw’u Burundi bwakoze n’uko aba basirikare badasimbuzwa. Ati: “Nta kindi gihugu cyohereza abasirikare babo muri ben’ubu butumwa, ngo kireke ku basimbuza abandi mu gihe baba barengeje amezi atandatu batarasimburwa”
Hagati aho aba basirikare b’u Burundi bavuze ko ababo baheruka kugwa ku rugamba batazwi neza umubare, kuko bapfuye ari benshi. Bakavuga ko hari ama batayo atarashobora kumenya neza abasirikare bayo aho bari. Ndetse byibuze ngo babe bamenya n’abafatiwe ku rugamba, cyangwa ababuriwe irengero.
Nk’uko byasobanuwe muri ubu butumwa, byavuzwe ko abasirikare b’u Burundi baheruka gupfira ku rugamba ko bapfiriye gushira, kandi ko abapfuye cyane bari mu basirikare bashyashya, ahanini ngo abasirikare bavanwe mu mafunzo yo mu Cankuzo, bahita boherezwa ku rugamba bataramenyera ibyigisirikare n’urugamba.
Muri iyo mirwano iheruka guhuza M23 n’ihuriro ry’Ingabo zirwana ku ruhande rwa leta yabereye mu duce two muri Teritware ya Masisi na Rutshuru.
Iyo mirwano ndetse ngo yakomerekeyemo n’abasirikare bakuru b’u Burundi, barimo Lt Col Bizimana uyoboye batayo ya Gatanu na Lt Col Mbwayiba wari usanzwe ayoboye batayo yicyenda. Bose ubu n’inkomeri zibabaye.
Muri ubwo butumwa kandi aba basirikare bavuze ko kugeza ubu batazi icyo barwanira muri Congo, ntibazi icyo bapfira. Kandi bagasaba ko bagenda basimburwa kugira ngo baje kureba imiryango yabo.
Rwandatribune.com
