Haruna Ndayizigiye wari umwe mu bayobozi b’Ishyaka CNDD FDD riri ku butegetsi mu Burundi biravugwa ko yarasiwe i Bwasare muri Komini Gasorwe mu ntara ya Muyinga mu burasirazuba bw’u Burundi.
Ubuyobozi bwa Komini Gasorwe bwemeje aya makuru bunatangaza ko inzego z’umutekano zimaze guta muri yombi abantu 2 bikekwako barashe uyu mugabo.
SOS Media Burundi itangaza ko Ndayizigiye uri mu kigero cy’imyaka 30 y’amavuko yarashwe mu ijoro ryo kuwa mbere ubwo yarimo kugerageza guhunga umwicanyi.
Umwe mu batangabuhamya baganiriyre na SOS Media Burundi yavuze ko Ndayizigiye yishwe n’ibikomere by’amasasu yarashwe mu nda, ubwo yari ajyanwe ku bitaro n’abagize umuryango we.
Umuyobozi wa Komini Gasorwe Dieudonné Niyonizigiye yavuze ko polisi yafashwe 2 mu bakekwaho kurasa Ndayizigiye, ndetse anashimangira ko inzego z’umutekano zamaze no kubona intwaro yakoreshejwe.
Kuva mu ntangiro za Nzeri , u Burundi bukomeje kwibasirwa n’ubwicanyi bw’abitwaje intwaro ndetse n’iboitero bya Grenade, aho Guverinoma yo itangaza ko ibirimo gukorera muri iki gihugu ari ibikorwa by’iterabwoba byihishwe inyuma n’abarwanya ubutegetsi bw’u Burundi.
