Col Joseph Rushimisha uzwi nka Col Mitabu w’Umunyamulenge yatorotse igisirikare cya Repubulika iharanira Demokarasi ya Congo (FARDC) ajya kwihuza n’imitwe ivuga ko iharanira umutekano n’ubwirinzi bw’abo mu bwoko bw’Abanyamulenge.
Imitwe ya Twirwaneho na Gumino niyo irangaje imbere indi mitwe y’abo mu bwoko bw’Abanyamulenge , buri mutwe muri iyi ugiye uyoborwa n’umwe mu bahoze mu gisirikare cya FARDC.
Iyi mitwe ihuriza ku kuba igomba kwicungira umutekano nyuma y’uko bagiye bagabwaho ibitero n’aba Mai Mai (Aba Bembe n’Aba Fuliiru) bakabanyaga inka ingabo z’igihugu zirebera.
Col Mitabu, yahoze akuriye urwego rushinzwe ibikoresho muri Rejima ya 3413 ikorera muri Teritwari ya Rutshuru mu ntara ya Kivu y‘Amajyaruguru.
Mu mwaka 2018, Col Mitabu yashinjwe icyaha cyo gusambanya umwana, arafungwa nyuma aza gutoroka gereza mu buryo butavuzweho rumwe.
Icyo gihe, ibiro by’umugenzuzi mukuru w’igisirikare cya Congo byemeje ko yatorotse nyuma y’umugambi yapanze wo kwirwaza no guha abapolisi ruswa y’inoti z’amadorari bakaza kumucikisha.
Muri iyi mitwe y’ubwirinzi bw’abanyamulenge, Col Mitabu asanze abandi basirikare b’abanyamulenge bahoze mu buyobozi bukuru bw’igisirikare cya Congo Kinshasa nka Col Rukunda Michael alias Makanika uyobora umutwe wa Twirwaneho,Col Shyaka Nyamusaraba uyobora Ngumino, Col Sematama Charles watorotse muri Werurwe umwaka 2021 na Col Nsengiyumva uheruka kuvugwa ariko kugeza ubu amakuru akaba ataremezwa neza.
