Majoro Rugaravu La Fontaine, Umuvugizi w’igisirikare cya FDLR kizwi nka FOCA yanyomoje ibivugwa ko Col Ruhinda yiciwe mu mirwano yabahanganishije n’umutwe wa M23.
Majoro Rugaravu La Fontaine. Umuvugizi w’igisirikare cya FDLR yanyomoje ibivugwa ko Col Ruvugayimikore Protogene uzwi nka Ruhinda yaba yariciwe mu mirwano yari ihanganishije umutwe wa M23 na FARDC aho FDLR /CRAP yarwanaga ku ruhande rwa Leta.
Mu kiganiro yagiranye n’isoko ya Rwandatribune iri ahitwa Makomarehe yanyomoje ayo makuru agira ati:”Col.Ruhinda ni muzima kandi nta n’inkorora arigutaka rwose.”
N’ubwo Majoro Rugaravu La Fontaine avuga ibi ,hari andi makuru yavugaga ko uyu Col Ruhinda yaba yarakomerekeye ahitwa Bizuru ho muri gurupoma ya Buhumba mu mirwano imaze iminsi 5 ihanganishije umutwe wa M23 na FARDC ifatanyije na FDLR.Aho Bizuru habarirwa byibura abasirikare ba FARDC barenga 90 bahaguye, mu gihe bivugwa ko abarwanyti ba FDLR bagera kuri 80 nabo bahiciwe.
Umunyamakuru wacu uri Goma avugako ibitaro bikuru bya Goma birikuvurirwamo abarwanyi ba FDLR bakomerekeye kuri rugamba ndetse n’abasirikare ba Leta(FARDC). Umwe mu basirikare ba FARDC uharwariye utashatse ko amazina ye atangazwa yabwiye umunyamakuru wacu uri Goma ko aho Bizuru hakomerekeye abasirikare ba FDLR benshi bikekwako na Col Ruhinda yaba arimo.
Mwizerwa Ally
