Ambasaderi w’u Rwanda muri Pologne, Prof Shyaka Anastase ari kumwe n’Umuyobozi Wungirije wa Polisi y’u Rwanda, DIGP Felix Nmuhoranye bitabiriye imurika ry’ibya gisirikare riri kubera muri Pologne.
Byatangajwe n’ambasade y’u Rwanda muri Pologne mu butumwa yanyujije kuri Twitter yayo aho yatangaje ko Prof Shyaka Anastase na DIGP Felix Namuhoranye bagiye muri iri murika riri kubera mu Mujyi wa Kielce.
Ambasade y’u Rwanda itangaza ko iri murika rizwi nka International Defence Industry Exhibition ribaye ku nshuro ya 30, ryafunguwe ku mugaragaro na Minisitiri w’Ingabo muri Pologne, Mariusz Błaszczak akaba na Minisitiri w’Intebe Wungirije.
Iri murika ry’ibya gisirikare, rinamurikirwamo intwaro zifashishwa mu gucunga umutekano, ryitabiriwe n’ibigo 624 byo mu Bihugu 31.
Ni imurika ryitabiriwe n’Ibihugu bifite ibigwi mu bya gisirikare nka Leta Zunze Ubumwe za America, u Budage, u Bwongereza ndetse na Korea.
Umuyobozo Wungirije wa Polisi y’u Rwanda ushinzwe Ibikorwa, DIGP Felix Namuhoranye, yitabiriye iri murika mu gihe mu Cyumweru gishize yari muri Leta Zunze Ubumwe za America aho yari yitabiriye inama y’Umuryango w’Abibumbye y’Abayobozi ba Polisi, yanatangiyemo ikiganiro cyagarutse ku mikorere ya Polisi y’u Rwanda.
RWANDATRIBUNE.COM
