Umunyapolitiki utavugarumwe n’ubutegetsi bwa Uganda, Dr Kiiza Besigye yatawe muri yombi kuri uyu wa Kane akekwaho gushishikariza abaturage kwigaragambya.
Dr Besigye yatawe muri yombi nyuma y’intambwe nke yarateye avuye iwe mu rugo i Kisingati mu karere ka Wakiso kari rwagati muri Uganda.
Chimpreports yanditse ko Dr Besigye yatwawe n’itsinda rya Polisi ya Uganda rishinzwe kurwanya imyigaragambyo.
Besigye bivugwa ko yari amaze iminsi akangurira abayoboke b’ishyaka rye FDC kujya mu mihanda bakigaragambya bamagana izamuka ry’ibiciro ku masoko ya Uganda.
Ikigo gishinzwe ibarurishamibare muri Uganda giheruka gushyira hanze imibare yerekana ko ibiciro by’ibicuruzwa ku masoko ya Uganda byazamutse ku kigero cya 77.6% kuva muri Ukuboza 2021 kugeza muri Gashyantare 2022.
