Muri Nyakanga uyu mwaka nibwo umukuru w’igihugu cya Congo Kinshasa bwana Felix Antoine Tshisekedi Tshilombo yashyizeho urwego rw’igihugu rushinzwe gusubiza mu buzima busanzwe abahoze ku rugerero. Ubuyobozi bw’ uru rwego bukaba bwahawe uwahoze ari inyeshyamba igihe kinini, ibintu bitavuzweho rumwe muri iki gihugu aho nka Denny Mukwege yagaragaje impungenge ze kuri uyu muyobozi.
Dr Denny Mukwege, wabonye igihembo cyitiwe Nobert muri 2018, akaba ari umuganga mu burasirazuba bwa Congo, agace kabaswe n’intambara z’urudaca muri iki gihugu, akaba kuri uyu wa gatatu yarerekanye ko ahangayikishijwe n’izamurwa mu ntera ry’uwahoze ayoboye inyeshyamba.
Tommy Tambwe wabaye muri RCD-Goma, akagaragara no muri M23, imitwe yitwaje intwaro yakoreye mu burasirazuba bw’igihugu cya Congo Kinshasa, mu mpera z’icyumweru gishyize akaba yarahawe kuyobora urwego rw’igihugu rushinze gusubiza mu buzima busanzwe abahoze mu ngabo (PDDRC-S).
Mu itangazo Dr Denny Mukwege yashyize ahagaraga yagize ati: “Turagaragaza impungenge zacu ku ishyirwa mu mwanya ry’uyu muyobozi”. Aha yashatse kugaragaza ko uru rwego rwakomeje kugaragaza intege nke, nko kuba abahoze mu ishyamba bakoze ibyaha by’intambara, aho gukurikiranwa n’amategeko, bakomeje guhabwa icyo yise ibihembo.
Abajijwe na AFP kuri uyu mwanzuro wa perezida wo gushyira bwana Tambwe ku buyobozi bw’ uru rwego, umuyobozi muri perezidansi ya Congo Kinshasa yagize ati: “Uyu mugabo nta rutonde na rumwe rwa LONI yigeze agaragaraho rumushyira mu banyabyaha, cyangwa ngo abe yarakurikiranwe n’urukiko urwo ari rwo rwose ashinjwa ibyaha by’intambara.
Akomeza agaragaza ko uyu mugabo azi aka karere neza, akaba yumva n’ indimi zihavugwa, ikirenzeho, nawe akaba yarasubijwe mu buzima busanzwe avuye mu gisirikari muri gahunda nk’iyi. Ni nde wundi waba ari mu mwanya mwiza wo kuba yakora aka kazi nk’uyu mugabo? Uyu muyobozi muri perezidansi arangiza agira ati: “Byaba byiza mu gushaka amahoro wifashishije uwigeze kuyarwanya”.
Tubibutse ko muri Mata uyu mwaka, Dr Denny Mukwege n’imiryango myinshi itegamiye kuri leta basabye perezida wa repuburika kurwanya umuco wo kudahana wakomeje kugaragara mu burasirazuba bwa Congo, agace kamaze imyaka irenga 30 mu ntambara z’urudaca.
Denny Mugisha
