Mu gace ka Lweba hubuye imirwano hagati y’imitwe yibumbiye hamwe Wazalendo n’ingabo za Repubulika ya Demokarasi ya Congo (FARDC). Ni imirwano yatangiye ejo kuwa 17 Kanama 2023, mu masaha ya saa saba z’amanywa.
Amakuru dukesha imboni yacu iri muri Teritwari ya Fizi, avuga ko abarwanyi bo mu mutwe wa Mai Mai Bishambuke n’Abasirikare ba leta ya congo, barwaniye neza na neza mu gace ko mu Lweba, muri Secteur Tanganika, Teritware ya Fizi, Intara ya Kivu y’amajyepfo, mu gihugu cya Republika ya Demokarasi ya Congo. Aha akaba ari agace kari hagati ya Baraka na Lusenda.
Iyo mirwano yatumye abaturage benshi bahunga bagana mu bice bitarimo intambara bikikije Lweba. Gusa nta byinshi biratangazwa kuri Iyi ntambara ariko bivugwa intandaro y’iyo mirwano ari uko Mai Mai Bishambuke yarimo yaka abaturage imisoro inyuranyije n’amategeko.
Tubibutse ko Wazalendo( bisobanuye abakunda igihugu kurusha abandi) ari ihuriro rigizwe n’imitwe myinshi y’inyeshyamba ibarizwa mu burazirazuba bwa Congo, irimo Mai MAI Bishambuke, Nyatura, CMC, APSLS,FDLR n’indi yishyize hamwe ngo ifashe FARDC kurwanya M23.
Ibi bibaye nyuma y’uko byokomeje kuvugwa ko kuba umukuru w’igihugu cya Congo, ahaye iyo mitwe y’inyehyamba ibarizwa mu gihugu cye intwaro ngo zifashe FARDC kurwanya inyeshyamba za M23, ko adakemuye ikibazo ko ahubwo yoroye amabandi yitwaje intwaro cyane ko kuva yazihabwa batahwemye kubuza amahoro abaturage babasahura inka, babasahura ibyo mu mirima, basahura amaduka y’abaturage n’ibindi aho kubarindira umutekano.
Uwineza Adeline
