Ku wa gatatu, tariki ya 16 Ukuboza, ingabo za Repubulika Iharanira Demokarasi ya Kongo (FARDC) zatangaje ko zafashe Major Sukami Willy wari waburiwe irengero atwaye umushahara w’ingabo zigize umutwe udasanzwe washyiriweho kurwanya umutwe witwaje intwaro wa ADF.
Iburirwa irengero ry’uyu musirikare mukuru mu Ngabo za Repubulika iharanira Demokarasi ya Kongo FARDC ryabaye kuwa 26 Ukwakira aho bivugawa ko yari yibye angana na 172.000.000 CDF( Miliyoni 83 mu mafaranga y’u Rwanda).
Anthony Mwalushayi, umuvugizi w’umutwe udasanzwe ushinzwe kurwanya umutwe wa ADF muri Kivu y’Amajyaruguru Sokola 1 Grand Nord-Kivu yemeje aya makuru y’itabwa muri yombi ry’uyu musirikare.
Yagize ati “uyu musirikare mu mutwe wa S1 yari yazimiye kuva ku ya 26 Ukwakira afite ibahasha irimo arenga 172.000.000fc yagenewe kwishyura abasirikare bagize uyu mutwe. Ibyo akurikiranweho bizashyikirizwa ubushinjacyaha bwa gisirikare bwa Beni kugira ngo bakore iperereza ”,
Mu minsi ishize nibwo ibibazo byo kunyereza amafaranga yagenewe igisirikare mu karere ka Beni byamaganwe n’itsnda ry’abadepite mu nteko ishingamamategeko ya Kongo Kinshasa.
