Ingabo za Repubulika ya Demokarasi ya Congo (FARDC) biravugwa ko zahaye abarwanyi ba FDLR bayobowe na Brig Gen Ruhinda imbunda n’imyambaro ya gisirikare ngo bayifashe kwirukana abarwanyi b’umutwe wa M23.
Umuvugizi wa M23 Willy Ngoma atangaza ko ibirindiro byabo byagoswe n’umutwe w’abarwanyi ba FDLR, bayobowe na Brig Gen Ruhinda (ugaragara ku ifoto).
Ati “Ingabo za Congo zahaye FDLR intwaro zikomeye mu bice bya Masisi. Ni abarwanyi bagera ku 1000 bambaye impuzankano ya FARDC. Bagose ibirindiro byacu hafi ya Pariki y’Igihugu ya Virunga.
Umutwe wa M23 washinzwe ku wa 4 Mata 2012, ariko uza gutsindwa intambara mu mwaka wa 2013, abari bawugize baratatana bamwe bahungira muri Uganda, abandi mu Rwanda.
Gusa kuva mu myaka mike ishize wongeye kwisuganya, ushinja Leta kutubahiriza amasezerano basinyiye i Nairobi mu 2013, yagenaga uburyo bwo guhosha imirwano burundu n’abarwanyi bahunze bagatahuka.
Mu kwezi gushize M23 yashinjwe n’Ingabo za Leta ya Congo kugaba ibitero ahitwa Nyesisi mu Ntara ya Kivu y’Amajyaruguru, hafi ya Pariki y’Igihugu ya Virunga.Ibi bitero bikaba byaraguyemo abasirikare ba FARDC bagera kuri 41.
Uyu Brig Gen Ruhinda asanzwe ayobora umutwe udasanzwe w’ingabo za FDLR CRAP bivugwa ko yitabajwe kubw’amasezerano umutwe wa FDLR wagiranye na FARDC ubwo iheruka kugota ibirindiro bya Gen Nzabamwita Kalume biri i Maginga muri Teritwari ya Rutshuru.
Si ubwa mbere FARDC yitabaza umutwe wa FDLR mu guhangana na M23 kuko no mu mwaka 2013 ubwo M23 yasubizwaga inyuma , Uyu Ruhinda wari ufite ipeti rya Colonel icyo gihe we n’abarwanyi be bahawe intwaro n’impuzankano bakajya gufasha ingabo kurwanya uyu mutwe.
