Mu mirwano yabereye muri Nyiragongo na Rutshuru, Ingabo za Leta ya Repubulika ya Demokarasi ya Congo (FARDC) n’abo bafatanyije bongeye kwitabaza indege yanarashe mu baturage, aho kurasa mubo bahanganye,aba basirikare kandi barashinjwa gusahura inka z’abaturage n’indi mitungo.
Ni imirwano yari irimo inyeshyamba za FDLR, Imbonerakure z’u Burundi n’abandi bose bibumbiye mu cyiswe Wazalendo basanzwe bafatanya na FARDC bari bahanganye n’inyeshyamba za M23.
Iyi ndege yibasiye agace ka Rwaza na Mwaro byo muri Gurupoma ya Kibumba, muri Teritwari ya Nyiragongo, mu bice biherereye mu nkengero z’Umujyi wa Goma, bituwe n’Abaturage benshi.
Iyi mirwano kandi yari ikomeye, kuko inyeshyamba za M23 zashushubikanyije abo bari bahanganye bikaba ngombwa ko bitabaza indege, nayo aho kurasa mu bo bahanganye irasa mu baturage.
Aba basirikare ubwo bahungaga, bagiye biba inka z’abaturage, ihene n’intama ndetse n’ibindi bikoresho basangaga aho banyuraga .
Iyi ndege yatangiye kwifashishwa ku gicamunsi cyo kuri uyu wa 8 Ugushyingo 2023, ubwo abasirikare bafatanya na FARDC bari bamaze gukizwa n’amaguru, hanyuma bagatabaza abakoresha indege kugirango abari basigaye bagoswe na M23, babone uko babava mu nzara.
Uwineza Adeline
Rwanda Tribune.com
