Igisirikare cya Israel cyaraye kigabye igitero kw’ishuri riri hafi ya Deir al-Balah, mujyi uri hagati mu ntara ya Gaza, cyahitanye Abanyapalestina nibura 30 abandi barenga 100 barakomereka, nk’uko bitangazwa na minisiteri y’ ubuzima muri leta ya Hamas.
Igisirikare cya Israel (IDF) cyanditse ku rubuga rwacyo rwa Telegram ko ibirindiro by’ingabo za Hamas zigenzura intambara byari byashinzwe muri iryo shuri Khadija School.
IDF yongerako ko igisirikari cya Hamas aricyo kigenzura iri shuri ndetse ari nacyo gitanga amategeko ari naho bateguriraga ibitero, kandi ko ari n’aho babika ibikoresho by’intambara birimo n’ intwaro zikomeye.
Minisiteri y’ ubuzima muri Gaza ivuga ko amashusho yerekana ko abapfuye bari abasivire kandi ko hafi bose ari abana. BBC yashoboye kubona no guhinyuza videwo yerekana abana mu bakomeretse.
Urwego rw’igihugu rushinzwe gucunga umutekano w’abaturage muri Gaza ruvuga ko iri shuri ryari ricumbikiye impunzi. Inyujije itangazo ku rubuga rwayo rwa Telegram Hamas ivuga ko amakuru avuga ko iri shuri ryakoreshwaga mu bikorwa bya gisirikare ari “ikinyoma” kandi ko “impunzi, abarwayein’abakomeretse, abenshi muri bo abagore n’abana”, bishwe.
Uwabibonye Mustafa Rafati yabwiye BBC dukesha iyi nkuru ko iturika ry’igisasu ryamutigishije cyane agahita yitura hasi. N’ubwoba bwinshi, avuga ko yirutse ajya muri iryo shuri akabona ibihimba by’umubiri byangiritse mu buryo buteye ubwoba”.
IDF ivuga ko imbere y’uko ikora iki gitero yari yafashe icyemezo cyo kugabanya ingaruka zagera ku basivire, “harimwo ikoreshwa ry’amasasu yemewe, igenzura ryo mu kirere hamwe n’igendereza ry’inyongera”.
Minisiteri y’ ubuzima muri Gaza ivuga ko abantu 53 aribo bishwe abandi 189 barakomereka kuva mu gatondo cy’ejo ku wa gatandatu kubera ibibombe by’igisirikare cya Israel i Deir al-Balah no mu mujyi wa Khan Younis kiri mu majyepfo.
Ibi bibaye mu gihe Visi Perezida wa Reta zunze Ubumwe za Amerika Kamala Harris – uhagarariye ishyaka rya’aba-Democrats mu matora y’umukuru w’igihugu ategekanijwe mu Ugushyingo uyu mwaka – yabonanye na Minisitiri w’ intebe wa Israel Benjamin Netanyahu akamubwira ko igihe kigeze ngo intambara muri Gaza ihagarare.
