Ingabo zihuriweho na Uganda na Repubulika iharanira Demokarasi ya Congo ziri mu bikorwa byo guhangana na ADF muri Kivu y’Amajyaruguru na Ituri zaburiye abaturage ko bashobora kwibasirwa n’ibitero by’abiyahuzi muri iyi minsi.
Mu itangazo ryashyizweho umukono na Brig Gen Flavia Byekwaso uvugira Ingabo za Uganda na Maj Gen Leo Richard Kasongo Chibangu uvugira FARDC , rivuga ko mu gihe ingabo zikomeje ibikorwa byo guhiga inyeshyamba za ADF nazo zishobora kubaca mu rihumye zikagaba ibitero by’ubwiyahuzi mu baturage .
Iri tangazo rivuga ko mubyo izi nyeshyamba zishobora kuza zigaragara mu myambaro y’ingabo za Uganda zigamije gusiga icyasha umubano mwiza uru hagati y’ingabo za Uganda n’abaturage ba Repubulika iharanira Demokarasi ya Congo.
Bagize bati” Intego ya Mbere y’izi nyeshyamba ni ugukomeza guhungabanya umutekano w’aka gace no gukomeza kwangisha ingabo abaturage”
Iri tangazo ry’ingabo zihuriweho risoza risaba ko abaturage bakomeza kugira amakenga ku bantu babonye batazi, abo baketse bagahita batungira ingabo agatoki .
