Lt Gen Muhoozi Kainerugaba umuhungu wa Perezida wa Uganda Yoweri Kaguta Museveni akaba n’umugaba w’ingabo zirwanira ku butaka mu ngabo za Uganda, yasesekaye i Kigali mu ruzinduko rw’akazi rugamije gushimangira umubano w’ibihugu byombi urimo gusumizwa mu murongo.
Ni uruzinduko rwa kabiri Gen Muhoozi Kainerugaba agiriye mu Rwanda kuva uyu mwaka wa 2022 watangira.
Gen Kainerugaba i Kigali yakiriwe na Charge d’Affaires wa Ambasade ya Uganda i Kigali, Anne Katusiime, Brigadier General Willy Rwagasana ukuriye abashinzwe umutekano w’abayobozi bakuru b’igihugu n’Umuvugizi w’Ingabo z’u Rwanda, Col Ronald Rwivanga.
Gen Muhoozi Kainerugaba yaherukaga mu Rwanda kuwa 22 Mutarama 2022 aho yagiranye ibiganiro na Perezida Paul Kagame byanatanze umusaruro ku ifungurwa ry’imipaka ibihugu byombi bihuraraho.
