Lt Gen Muhoozi Kainerugaba, imfura ya Perezida Museveni akaba n’umugaba w’ingabo zirwanira ku butaka mu gisirikare cya Uganda, yishyuye ideni ikipe y’igihugu cye ya Basket yari ibereyemo Hotel yo mu Rwanda yayakiriye.
Mu minsi yashize nibwo amakuru yamenyekanye ko Ikipe y’igihugu ya Basketball ya Uganda izwi nka Silverbacks yangiwe gusohoka muri Hotel Park Inn mu mujyi wa Kigali nyuma yo kubura ubwishyu bw’icumbi n’ibindi nkenerwa yakoresheje ubwo yari mu mikino y’igikombe cya Afurika cy’umukino w’intoki wa Basket ( Afro Basket).
Amakuru y’uko Gen Kainerugaba yishyuriye iyi kipe uwo mwenda yatangajwe bwa mbere n’ishyirahamwe ry’umukino wa Basket muri Uganda binyuze mu butumwa ryanyujije ku rubuga rwa Twitter bushimira uyu musirikare ku kuba yafashije ikipe y’igihugu cye.
Muri ubu butumwa bagize bati” Turashimira Gen Kainerugaba wiyemeje gutabara ikipe ya Silverback ayishyurira umwenda yari ibereyemo Hotel , ubu ikaba yemerewe kuva i Kigali ntankomyi”
Ishyirahamwe rya Basketball muri Uganda ryavuze ko amafaranga yishyuwe na Gen Kainerugaba agera kuri miliyoni 188 z’Amashilingi .
Ikipe y’igihugu ya Uganda iheruka gusezererwa na Cap Vert yayitsinze amanita 79 kuri 71.
