Umunyabanga Mukuru w’Umuryango w’Abibumbye António Guterres yasabye Guverinoma ya Repubulika iharanira Demokarasi ya Congo kwerekana byihuse abagize uruhare mu mfu z’abasirikare ba MONUSCO baguye i Butembo mu myigaragambyo yabaye kuri uyu wa Kabiri tariki ya 26 Nyakanga 2022.
Ibi Gutterres yabivuze mu tangazo ryashyizwe ku rubuga rwa UN kuri uyu wa 27 Nyakanga 2022.Uyu muyobozi wa UN yanenze kandi yamagana ibikorwa by’imyigaragambyo n’ubwicanyi burimo gukorerwa abakozi b’umuryango w’Abibumbye muri Repubulika iharanira Demokarasi ya Congo.
Umunyamabanga wa UN yihanganishije imiryango y’aba basirikare ba UN, ndetse anifuriza abakomerekejwe gukira vuba.
Guterres yavuze ko UN yiteguye gukorana na Guverinoma ya RD Congo mu rwego rwo gushaka abagize uruhare mu kwica aba bakozi bayo mu maguru mashya.
Guterres yasoje ubu butumwa avuga ko MONUSCO igifite ishingano zo kurinda ubusugire bwa RD Congo, Kubungabunga ubumwe bw’Abanyekongo no kugarura amahoro nk’uko ari bimwe mu bigize intego yatumye ubu butumwa bushyirwaho.
Yasabye umuhagarariye i Kinshasa[Bintou Keita] gukomeza gukorana na Leta ya Kinshasa kugeza abagize uruhare mu myigaragambyo n’akavuyo kaguyemo abatari bake bagejejwe mu butabera.
Mu basirikare 3 ba UN baguye muri iyi myigaragambyo, hari umunya-Marroc umwe( Umusirikare), n’abapolisi babiri, umwe ukomoka mu Buhinde n’undi umwe ukomoka mu Misiri.
